陳豪、楊茜堯及陳自瑤等近排忙於喺深圳為新劇《玫瑰戰爭》開工，不時喺街上被網民「野生捕獲」，新劇講娛樂圈女性復仇懸疑故事，飾演「陳雲生」嘅陳豪，跟楊茜堯及陳自瑤更有不少對手戲，噚日有網民喺當地一間知名港式餐廳見到陳豪同陳自瑤對稿。
一向好有觀眾緣嘅陳豪，去到邊都非常耀眼，日前被網民見到佢同飾演「夏無雙」嘅楊茜堯喺當地一個小區取景拍攝，網民指近距離睇到視帝陳豪演技真係絕，讚陳豪喺鏡頭前狀態超棒，該網民寫道：「感覺這部劇會是TVB的又一力作，光是在小區看到的這一點拍攝場景，就已經讓人充滿遐想了。好期待它快點播出，到時候一定要追起來。」雖然影片中未見茜堯正面，不過網民睇到茜堯嘅背景都讚好美啊！
而噚晚有網民見到陳豪身穿黑色型佬look現身餐廳，同陳自瑤一齊對戲，埋位時見佢哋張枱放滿各種琳瑯滿目嘅美食，二人邊食邊拍，二人相當入戲，該網民亦讚陳豪真人比照片更帥。
今日另一位網民見陳豪喺深圳大梅沙嘆咖啡，今次《玫瑰戰爭》劇情聚焦喺四大女星捲入一宗富豪駭人碎屍案，同樣有殺人嫌疑，案件背後暗藏娛樂圈黑暗面與復仇角力，呈現權力操控下，娛樂圈生存困境，而陳豪係該劇男主角，周旋喺女星們之間，戲份頗為突出，難怪陳豪喺嗰度開工前要飲杯靚咖啡提神啦！