廖啟智嘅遺孀 陳敏兒 10月17號啱啱度過65歲生日，佢日前透露今年6月份先做完大手術，不過手術後嘅敏兒恢復得唔錯，近日佢就上傳一張同胡楓以及盧海鵬嘅合照，睇上去氣色不俗，而兩位前輩同樣精神奕奕。
敏兒話自己要向呢兩位前輩學習，因為佢哋都為自己嘅身體負責任，日日堅持有充足嘅運動量。「修哥，我年輕跟他共事的時候，見他每天都在化粧間步行，至今仍是堅持步行運動。鵬哥經歷過心臟手術之後，體力和狀態都不算理想；但仍每早都堅持跑步一小時，為自己的健康努力。」敏兒話自己喺兩位前輩面前不禁汗顏，所以決定要好好運動，唔可以偷懶。
講開今年生日，陳敏兒就送咗一份禮物俾自己，正式開始經營自己嘅YouTube頻道，頻道首播內容中，敏兒透露自己去年生日舉行一場好特別嘅生日會，係一場生前告別會：「其實我係一個慢性病患者，近呢兩年身體嘅狀况愈嚟愈唔理想，去年眼見好多位親友相繼離世，人生無常，冇法預料邊個會走先。我知道好好道別有幾緊要，既然冇辦法預知未來，不如把握當下，趁仲有機會，好好表達內心入面嘅說話，減少分離嘅遺憾。」影片內容可以見到，包括修哥、羅蘭姐、三哥苗僑偉同三嫂戚美珍、廖安麗、蔡少芬等都有參與呢場生前告別會。
敏兒亦公開自己嘅病況，佢話今年6月身體出現嚴重狀况，需要接受場大手術。自己喺手術前同兩子盡訴心中情︰「如果死，我OK；如果繼續活落去，我覺得都幾好。我相信一切有最好嘅安排，所以內心好平安。」敏兒完成手術後喺病床上一張眼就見到兩個囝囝對住自己微笑，「『啊﹗我冇死到﹗』我明白上天畀機會同責任我好好生活。」於是佢決定好好食飯、好好瞓覺、好好運動，重新調整工作同生活。
