Yumi鍾柔美呢日現身旺角，為自己新歌《不欠你一個朋友》應援活動打卡，吸引唔少粉絲帶備應援物到場同Yumi集郵。見到粉絲次次都出心出力支持自己，Yumi當然開心又感動。
Yumi新歌推出之後反應唔錯，以往以跳唱為主嘅佢，今次改唱抒情歌，所以都好緊張歌迷嘅反應：「我覺得個反應可以再好啲，咁我就會繼續再努力啲，再俾大家睇原來Yumi除咗快歌，都會唱慢歌，希望大家知道我有唔同嘅一面。」
佢有份演出嘅新劇《飛常日誌II》日前舉行開鏡儀式，雖然要兼顧學業同事業，不過Yumi就樂在其中：「劇組好好，會就返我返學嘅時間，如果放學有半日時間，就會留返俾拍劇。」講到 張馳豪 都拍同一套劇，Yumi就話自己同Aska同場嘅戲份唔多，主要嘅對手都係劇中兩位上司 高海寧 同 周嘉洛 。
