張繼聰 一手創作、苦練體能，兼顧後期到上映，歷時6年嘅電影《金童》即將上映，阿聰希望借新片鼓勵行內戰友，凡事唔好輕言放棄，就連好兄弟 朱栢康 都感激阿聰，喺遇上人生交叉點時扶自己一把。
朱康形容自己喺6年前接拍呢套戲時，正遇上人生最低潮。當時係「人生最大嘅一個難關、生命中一個好大嘅黑洞，自己對未來冇方向、冇目標，非常頹廢。」而阿聰令佢重拾信心。生活有一個明確目標。
為咗演好拳手角色，朱康同阿聰一齊接受艱辛嘅體能訓練。對打拳零認識嘅朱康為演活角色，特登搵咗一位MMA教練學打西洋拳。斷斷續續學咗1年後更愛上呢項運動。
朱康分享當初自己只得130磅，直到接到呢套戲後，花年幾時間操練增磅，最高峰更有200多磅。到正式拍攝時因為要脫水，務求達至拳手嘅形態感覺，最後減磅到160磅先上陣。朱康更被阿聰笑勁過Christian Bale（基斯頓比爾）：「因為當年拍戲短時間內又肥又瘦嘅身型效果，要用好多唔同support先可以達到。但我用土炮方法減肥、增磅、舉重…已成功達到與Christian相同效果。佢用呢個比喻讚美，我唯有接受！」
朱康亦見證阿聰無間斷操練、脫水，補充豐富蛋白質、碳水化合物等嘅辛苦鍛鍊過程，佢表示阿聰為保持肌肉線條除衫拍拳賽戲，由不停飲水，到後期滴水不沾，萬幸冇發生水中毒情況，朱康仲話：「我到而家都覺得佢（阿聰）其實有過度活躍症，仲擁有一副非凡身體。」
而朱康自爆喺拍攝拳賽場口時，因一時間唔適應連串脫水過程，曾一度出現思緒煩亂情況同副作用，個腦變得混沌但又要記走位、拳法：「剎那間真係記唔到，又驚打親人、走位又唔准、出拳又唔夠力，唔夠快，去到一個好徬徨嘅狀態，自己表現些少影響到拍攝進度」
不過好在阿聰好有耐心，仲話：「細佬唔使驚啦，你打落嚟啦，你真係出力打落嚟啦，你唔使就住我。」一次次嘅鼓勵，都令朱康非常感動。