10月23號就係黃翠如嘅生日，今年亦係翠如成為新手媽媽後嘅第一個生日！有囝囝「蕭哈哈」萬事足嘅翠如，喺社交平台貼出母子合照，蕭哈哈眼仔睩睩望住鏡頭，手仔貼住媽咪塊面，而翠如用母愛十足嘅眼神望住囝囝，非常有愛溫馨。
翠如喺配文寫：「回看，原來已經擁有了全世界，生日，快樂，我，蕭媽媽！」，陳敏之、周奕瑋、連詩雅、楊洛婷等藝人都有為翠如送上生日祝福，作為翠如另一半嘅蕭正楠竟然唔係向老婆講「生日快樂」，而係講「咦？無圖2嘅？errr ? 我呢？」呷曬大醋！一眾網民就留言稱「你已經俾仔仔取代了」、「你喺哈哈眼入面」、「有陣時清楚一下自己嘅地位」，非常搞笑！
不過再隔咗一陣，阿蕭喺社交平台開心出Post，貼出一張一家三口嘅幸福合照，表示：「終於搵到一張有我嘅相，呢個嬲，嬲得好快樂，嬲得好幸福。」佢仲形容翠如係「我的天下無雙」，又話「愛我要和哈哈一樣多」，閃到戴黑超都擋唔住！
