林正峰近年不時拍片喺社交平台分享貼地生活，仲特登學普通話正音，被網民大讚夠努力！阿峰出名慳家，更多才多藝，除咗演員身份，身兼多職密密賺錢，令粉絲叫佢做「打工皇帝」。
近日阿峰就喺社交平台以「原來香港藝人也要求職？面試好緊張」出片，原來阿峰一直有做兼職社工，佢喺片中表示自己啱啱完成舊合約，現時政府有新一輪三年嘅機會，而佢就要重新做面試同申請程序。阿峰分享心情，表示唔肯定係咪可以再做兼職社工，因為做社工唔適合染金髮，但佢係藝人身份，所以好感激當局諒解。
完成面試後，阿峰透露面試官好滿意自己表現，所以佢好有信心可以得到新一輪3年嘅兼職社工合約，仲同粉絲宣布即將入劇組拍新戲嘅喜訊！ 而喺阿峰最新發布嘅貼文可見，佢而家已經現身河北，為第一次擔正做領銜主演嘅電影入組，阿峰仲話：「第一次拍電影，第一次去到咁北方(河北)哈哈。遇到很多內地電視劇上會見到的前輩，感覺很奇妙。」阿峰仲開心表示呢次終於唔使寫滿拼音。
其實TVB藝人都係臥虎藏龍，唔只阿峰有多重身份，就好似近日因戀愛綜藝《女神配對計劃》爆紅嘅葉蒨文（Sophie），就係牙科診所兼職護士，主動協助執拾文件、核對預約及打掃藥房等；馬貫東就係寵物美容師，連佘詩曼愛犬都係經阿東之手變靚靚；楊證樺就榮升保安公司老闆，同一位拍檔合作開安全管理公司，不時就會見到去睇演唱會嘅粉絲遇到佢，順便合照打卡添！
