TVB經典劇集向來好受觀眾歡迎，要煲劇睇得過癮，男女主角互動好重要，令人印象深刻嘅劇集CP，就有《男親女愛》嘅「Miss Mo」鄭裕玲（Do姐）與「阿Lok」黃子華，近日再次合體重現該劇造型！
Do姐同子華拍TVB處境劇《男親女愛》，呢對經典劇集CP充滿喜感，當年於2000年播出時更一舉創下大結局50點嘅最高收視成績，超過300萬觀眾收看，時隔25年仍然係一代港人集體回憶，Do姐同子華合演情侶看似大纜都扯唔埋，點知喺螢幕前卻產生奇妙嘅化學反應，甜蜜得嚟零突兀感，深受觀眾喜愛，早前劇集重擋，再次令唔少觀眾敲碗以待，期待《男親女愛》能夠拍攝續集。
Do姐噚日喺社文平台上載影片，見佢同子華現身綠幕前疑似對稿，見二人手持一份劇本，一身造型與2000年《男親女愛》嘅戲服極為相似，Do姐以Miss Mo口吻講：「呢句Script，我諗住陣間畀啲Frustration，好冇呀？」而子華即以阿Lok式腔調回應：「一於你畀Frustration，我畀Solution啦！」其後工作人員示意佢哋埋位，二人隨即笑笑口準備開拍。
Do姐未有透露係拍廣告定合演舞台劇，只係留言表示：「隔咗咁多年...都仲有默契喎!」Do姐仲話25年後再合作，話聽晚有得睇。唔少網民話睇到呢條片後，腦海諗起「藍藍天空高掛我的夢🎶」，仲開心終於等到Do姐子華合體。
