Lulu黃路梓茵同陳漢典喺金鐘獎合體閃爆全場，典禮結束後，小倆口20號正式簽紙成為夫妻。漢典同黃偉晉等藝人日前出席新節目記招，首次以人夫身分面對媒體時難掩新婚喜悅。漢典就話，自己同Lulu仲有親朋好友夾到時間，所以就揀喺20號登記，而完成登記後，一行人就去咗唱K慶祝。至於幾時可以拎到吳宗憲嘅「生育津貼」？漢典表示，自己同老婆最近都好忙，未有時間計劃生仔！
今年金鐘獎最令人感動嘅一幕，就係經歷喪姊之痛嘅小S相隔八個月終於重新企上舞台，最後仲奪得最佳綜藝節目主持人獎。同樣有份入圍嘅漢典雖然失落獎項，但佢就好戥小S開心，第一時間送上祝福。漢典因為擔任小S同蔡康永主持嘅綜藝節目《康熙來了》助理主持更慢慢走進大眾眼光，喺典禮上再見「康熙」同台，佢都話夢回少年時代，自己都眼濕濕。
近日台灣男星閃兵風波再起，好多冇當過兵嘅男星都成為閃兵嫌疑犯，包括漢典。不過漢典係因為有扁平足，而收到當地政府嘅免役通知書。佢亦認為，被捲入閃兵風波嘅藝人要認真面對所做過嘅錯事。
至於有當兵嘅偉晉同樣鼓勵閃兵一族要勇於面對，佢嘅五堅情隊友陳零九都係閃兵名單嘅一員，偉晉坦言二人私底下已經好耐冇聯絡，五堅情嘅合體計劃亦遙遙無期。
