旦哥鄭丹瑞與初戀太太育有兩位千金大女鄭瑤（Zaneta）及細女鄭珉（Amanda），大女鄭瑤去年嫁金融才俊男友Jacob Chan，新婚後一年幾，鄭瑤今日喺IG貼出大肚照分享懷孕喜悅，70歲旦哥開心榮升外公。
鄭瑤喺社交平台留言：「Honey, I think I’ve gained some weight.（親愛的我想我的重量增加了）」旦哥去年分享大女出嫁喜訊，更因不捨女兒出嫁而哭成淚人，大女鄭瑤甜蜜喺社交平台以英語寫「我永遠是你們的寶貝，永遠是我人生中的初戀」，回應爸爸滿滿嘅愛！
旦哥一向放手讓阿女尋找自己興趣，發展自己嘅事業，而大女素有「學霸」之稱，早年喺英國GCSE中學會考獲11A佳績，喺美國修畢英國文學及政治學後，再去英國修讀莎士比亞歷史系碩士，精通中、英、德、法文四國語言，畢業回港後，做過時裝、公關等工作，現為時裝雜誌擔任編輯總監，經常出現時裝活動。
鄭瑤與老公Jacob喺日本邂逅，原本係分別喺東京某餐廳出席唔同嘅商務晚宴，二人偶遇發現大家都係香港人便開始傾偈，雙方喜歡睇書、睇畫，志趣相投。Jacob喺劍橋大學工程系，畢業後留咗喺倫敦工作，從事金融行業，之後去哈佛商學院讀MBA，其後回港幫忙打理家族辦公室，主要為富裕家族提供投資管理及財富管理。Jacob於2024年喺巴黎求婚，跟住舉行婚禮，話咁快就成為準爸媽，準備迎接BB出世。
