陳山聰 為母親80歲大壽設宴，廣邀親友為母大肆慶祝，除咗一家人總動員現身之外，山聰亦邀請一眾演藝圈同舞獅界好友同樂，好似 黃浩賢 林子善一家，以及郭政鴻等有出席。
孫仔Jaco 陳霆軒 為嫲嫲舞獅助慶，可愛又精神嘅動作就氹得嫲嫲眉開眼笑喇，之後Jaco又同Daddy山聰齊齊唱歌，先後唱老竇老友林峯嘅《愛在記憶中找你》、仲有《Para Para Sakura》，非常可愛。
而近年於內地發展嘅郭政鴻，就帶埋兩位囡囡 郭倩欣 郭詠之 現身，早年以武師身份入行嘅佢，近年於內地發展不俗，努力工作下早年更買入過千萬豪宅予家人安居。早前受訪時，仲提到唔反對兩位標緻嘅囡囡繼承衣缽入行發展。
