傅嘉莉 之前喺「2025亞洲影藝創意大獎」憑《刑偵12》獲得中國香港地區最佳女主角，首度升呢封視后。而最近Kelly就自爆再多一個新身份，重返校園成為大學生，於香港都會大學修讀珠寶學學士課程。
Kelly喺社交平台貼出自己上堂嘅自拍照，見到佢戴住眼鏡Cap帽又著住實驗袍，成為呢間大學科技學院嘅同學仔上「Lab堂」。Kelly亦貼文表達興奮心情：「8月底《玫瑰戰爭》正式開戰、9月中香港首屆珠寶學學士課程開始，又重回被拉緊緊的生活節奏，今天重回校園，親身實踐地操作高級鑑定儀器及分析譜圖結果，把天然鑽石，經處理的鑽石和培育鑽石鑑定出來考試刺激又好玩。」
Kelly演戲上嘅努力大家有目共睹﹐佢憑《反黑英雄》獲頒「萬千星輝頒獎典禮2024」最佳女配角，之後演出嘅《刑偵12》亦大獲好評。雖然劇接劇，但Kelly近年未有放棄自己另一個夢想，不斷進修寶石學課程。之前完成咗英國寶石學院Gem-A 鑽石學文憑高級課程DGA，仲獲得唔錯成績。跟住Kelly打算進一步報考珠寶應用科學大學學位課程，初頭以為要去到英國先有得讀，但咁啱香港今年就首辦相關學位課程，佢之前仲透露過估計讀多約一年就可以攞到學士學位。
其實Kelly喺開始修讀英國FGA寶石學課程時，一度因荷爾蒙失調兼壓力爆煲，加上同時兼顧拍攝《一舞傾城》同《香港人在北京》，心口由開始生粒粒發展到「鬼剃頭」，需要治療先痊癒。
呢輪Kelly要兼顧大學課程同拍攝劇集《玫瑰戰爭》，大家都好擔心佢身體會出狀況，仲有網民見Kelly化身眼鏡娘返學，留言問Kelly真前受傷嘅眼睛情況，而Kelly盲回復話經已康復。