有唱片公司於6間大學先後舉辦嘅School Tour，尾站日前於浸會大學舉行。 陳健安 馮允謙 黃淑蔓 雲浩影 盧慧敏 樂隊 Nowhereboys Boys 同 蔡浩然 等分別演出。安仔呢日亦公布好消息：「好開心，今次School Tour率先話畀大家知，明年1月10日，我會喺西九竹翠公園舉行個人演唱會。」之後又同現場同學玩遊戲派公仔，再落台同大家互動，場面熱鬧。
安仔早前喺社交平台以emoji叫大家估演唱會名，NWB主音Van就笑言：「『時間、象、爆開、椰子』？好難估呀！」安仔亦大笑話：「答案係『時的狀態』，2千幾人留言得一個估中，我要搵佢做friend！」
呢日適逢新加入唱片公司嘅成員Scott即將生日，師兄師姐們合唱完《會再見的》之後，Amy靜靜雞捧出生日蛋糕，令Scott非常驚喜，之後大家再同全場數百名同學仔合唱生日歌。Scott感動到口震震話：「人生第一次有咁多人同我過生日，多謝大家！」更將生日願望「分享」予同學仔，祝大家順利畢業！
之後仲話：「我好易喊架，之前喺台下睇Nowhere Boys唱《給受困者的一封信》時已經喊咗，所以努力控制，我怕淚崩。」佢透露原定今次School Tour與連家穎（Vian）表演雙人舞，豈料對方扭傷腳未能表演：「希望Vian早日康復。因為由雙人變單人舞，漏夜改歌和重新編舞步，而且第一個出場，所以緊張到爆汗，終於完成晒啦！我今日第一次喺台下睇晒整個騷，各位唱歌當然好優秀，最重要大家energy好好、同學仔反應好好，我學到好多嘢！」
Van經常在後台陪伴小師弟Scott練習，又為佢演出打氣，仲自爆細個幾乎學芭蕾舞成為舞者，：「當年父母帶我去跳舞學校報班時，點知學校執咗笠，摸門釘。」琴鍵手漁佬笑言以後NWB出騷，都會請Scott編一段舞蹈等Van圓夢表演。
NWB結他手Ken係浸大校友，Ken更係今年已第30屆嘅Band Soc第4屆大師兄，呢日佢就回憶話：「以前我成日喺度玩天光，好掛住呢個地方，今日返嚟表演，見到啲莊員好感動，好開心。」佢又鼓勵同學追夢：「當年Band Soc成日有表演，我嗰陣仲未有份彈，成日喺舊校ACHall睇騷，會諗自己幾時可以上台，估唔到20幾年後返嚟學校表演，感覺好特別。」
