台灣著名主持 曾寶儀 同男友導演 林明謙 合作拍攝紀錄片《交換禮物》，兩人作客《Startalk》接受 王鎮泉 嘅訪問，分享製作過程中嘅體悟。 寶儀透露紀錄片表面上訪問咗好多醫生、學者同病患等，其實中心思想係希望啟發大家有新角度去看待癌症，最終亦回歸探討人生經歷。
作為照顧者參加拍攝嘅寶儀亦感受良多，寶媽（王美華）曾三度罹癌，包括2004年嘅甲狀腺癌、2016年嘅淋巴腫瘤，以及2019年被診斷出肺腺癌。寶媽接受治療後都康復，喺過程中寶儀學會搵心理上嘅平衡點，令自己放下照顧過程中嘅壓力同自責。寶儀進一步分享過往都有過思想謬誤，好多陪病者覺得患者好返就係成功，未有痊癒就係失敗，唔少人更因為至親離世而有好多自責、好多遺憾。佢好欣慰唔少觀眾睇完作品後開始放下，選擇同自己和解。
寶儀透露拍攝紀錄片同時，亦係佢心靈上和解嘅過程，直言自己以前習慣將家人孭上身，希望家人健康、甚至係走正軌，當有事發生寶儀會即時諗係咪自己嘅錯，無照顧好佢哋，拍攝後令佢放下不必要嘅責任同負擔，尊重每人有自己嘅生命選擇。
講到寶媽幾次罹癌，寶儀最初係驚訝多於恐懼，點解好返又嚟一個，有好多唔理解，拍攝作品後，學會將多餘嘅能量放喺照顧同陪伴家人上，而唔係將自己嘅擔心、恐懼轉駕去患者身上。
寶儀同時相當關心爸爸曾志偉，志偉平日工作相當忙碌，2023年曾因為心臟問題做手術，寶儀坦言爸爸係自己嘅修行，令佢學識尊重他人嘅人生選擇，作為女兒擔心還擔心，都希望爸爸可以盡情去做自己想做嘅事，寶儀唯有隨時候命，平日只提爸爸飲酒飲少啲同埋早啲瞓。
呢部作品亦係寶儀同男友首度合作﹐林明謙即時話情侶間一齊工作的確有難度，經常被女友問點解要採訪呢個人物，主持要扮演咩角色以及之後嘅走向，但林導覺得拍紀錄片應該同受訪者自然對答，唔需要太多設定，亦因為呢個想法上嘅分別令兩人不時發生激烈嘅討論。被問吵架時係咪贏唔過寶儀，林導即時點頭認同令全場大笑。
