張柏芝繼早前與劉嘉玲、劉曉慶、寧靜等為錄製內地綜藝節目《一路繁花2》，而現身TVB《愛・回家之開心速遞》嘅拍攝場景後，柏芝日前再分享佢喺電視城古裝街拍攝嘅花絮片，當中更有神秘嘉賓現身探班，對方就係曾經同為古裝街常客嘅黎姿。
身穿蒙古民族服飾嘅柏芝，喺片中表示自己正拍攝劇集《倚天屠龍記》，而其造型正係當年黎姿昔日所飾演嘅蒙古紹敏郡主。當黎姿到場後，柏芝先跟對方嚟個擁抱，相中所見，黎姿除咗與柏芝一齊錄製嘅朋友閒聊外，兩人又喺古裝街邊逛邊傾偈，黎姿仲對住鏡頭表示自己已經好耐冇嚟過古裝街。
另外，黎姿於27號亦於社交平台分享多張探班照，並於帖文中寫道：「期待我親愛的 @cecilia_pakchi_cheung 在《一路繁花2》的演出！趙敏因你而更奪目。永遠支持妳💓」
