76歲「Benz雄」許紹雄近年與家人移居新加坡享受半退休生活，自愛女許惠菁嫁人跟隨丈夫Shane喺香港定居，Benz雄亦決定回流香港陪伴女兒，改為經營父女檔拍片分享生活日常，今日有報道傳出Benz雄病危入院，親友及圈中好友黎芷珊、苗僑偉及戚美珍亦到醫院探望Benz雄。
Benz雄女兒許惠菁噚晚仍有更新社交平台，未想到今日傳出Benz雄病危消息，而TVB監製文偉鴻及林志華亦抵達醫院與Benz雄見面，眾人神情嚴肅。睇許惠菁嘅社交平台於10月20號仍有更新影片，見Benz雄同阿女一齊打機互動，而許惠菁喺5日前仍開心跟契媽韓馬利與杜燕歌開工。
Benz雄喺1992年與新加坡籍太太龍嬿而結婚，五年後喜獲女兒，一直視女兒為掌上明珠。 Benz雄出身名門家族背景身家過億，為廣州許氏家族嘅後人，其祖先係廣州四大鹽商之首嘅許拜庭、太公許應騤係慈禧太后契仔，而姑婆許廣平係魯迅妻子，Benz雄自細身世顯赫、衣食無憂，1958年隨家人移居香港，報考無綫藝員訓練班，成為TVB第一期藝員訓練班學員，剛入行已經常揸Benz返工，因此獲得「Benz雄」稱號，Benz雄入行半世紀，由於人緣極佳，相識滿天下，後輩好友佘詩曼、陳敏之等，更稱呼佢係「爸爸」。
