為晚期病患及其家屬提供支援嘅非牟利慈善機構善寧會，日前喺沙田舉行一連兩日開放日，向公眾展示善寧會嘅紓緩治療服務，並推廣生死教育，「善寧會親善大使」許家傑、廖慧儀、羅霖前夫劉坤銘等亦有出席。
活動上，善寧會正式啟動與癌症資訊網慈善基金嘅合作項目，宣布將參與馬拉松慈善計劃及慈善跑活動。向來熱愛運動嘅許家傑近年專注跑步，佢表示自己將會挑戰半馬賽事，仲話可以將自己跑步嘅喜好結合慈善，絕對有雙重意義。家傑同朋友成立咗跑會，而開放日呢日有唔少跑友到有到場，佢話：「一齊了解善寧會嘅工作，大家追求健康嘅同時亦係心靈上嘅一份滿足，畀晚期嘅病人同家屬有種同行嘅力量。」
家傑指今次慈善跑，佢將會號召TVB嘅藝員朋友一齊落場參加，特別係《愛‧回家之開心速遞》嘅同事，希望大家眾志成城揮灑汗水，一齊籌募更多善款。家傑又透露近日《愛回家》嘅拍攝工作雖然忙碌，不過都會每星期定期跟Hea Running Team跑會練跑，除咗備戰呢次半馬賽外，亦係佢減壓嘅最佳方法。
曾受情緒困擾嘅廖慧儀，就指自己係靠跑步走出低谷，佢又指現時自己同許家傑、林淑敏等成為同區跑友，經常參與佢哋嘅跑會練習。呢次廖慧儀獻出第一次出戰半馬賽事，而為咗備戰，佢而家每星期都跑三日，過程相當熱血：「試過最火嘅一次係禮拜五凌晨12點喺羅湖拍完劇，即晚過關返香港，瞓兩個鐘天未光就去跑，冇諗到自己咁鍾意、咁投入，亦係成為我生活嘅力量。我知道今次都有好多醫護代表一齊跑，真正做同『同行』嘅氣氛同意義，跑步都跑得特別有意義。」
