姚焯菲(Chantel)喺今年9月初飛美國就讀紐約大學，展開大學生新生活，一直有喺社交平台拍片或發布靚相報告返學嘅情況，最近Chantel貼出新一批靚相，透露心情唔係太好，為咗解思鄉之苦，見到Chantel貼出食燒味相。
Chantel貼出溫書相，配上貼文:「homesick + midterms = 💔」 相信因為思鄉加上面對期考嘅壓力令到Chantel有啲emo(情緒低落)。Chantel透過回味港式叉燒而緩解對香港嘅思念。
相中見到Chantel嘅手寫筆記，雖然依家唔少學生習慣電腦打筆記，甚至用AI製作溫書要點，估唔到Chantel愛用傳統方法手寫筆記，佢嘅筆記唔只整齊有調理，英文字體仲相當可愛，唔知呢種溫書嘅方法係咪Chantel成為學霸其中一個要訣。
Chantel成績一向唔錯，喺新西蘭讀書時唔止以特優生榮譽畢業﹐仲登上學校嘅頂尖學生榜，能夠上榜嘅IB至少要有40分，憑住呢個好成績Chantel成功考入全球知名嘅名牌大學紐約大學，攻讀四年嘅音樂商業學士課程。
Chantel作為《愛‧回家開心速遞》一員，深受熊家喜愛，「表姐」呂慧儀好似感受到表妹嘅情緒低落，亦喺限時動態拎住Chantel嘅簽名唱片，留言話:「Thank you sweetie 彤彤，We miss you too. Keep fighting (多謝可愛嘅彤彤 我們都很掛念你 繼續加油)。」
