許紹雄入院消息一出震驚娛樂圈，多位圈中人先後去到醫院探望，林峯、吳卓羲、林子善、姚瑩瑩等晚上現身醫院神情擔憂，眾人封口未有透露情況，而吳卓羲喺傳媒追問下表示擔心之情。
許紹雄情如父女嘅佘詩曼亦喺澳門出席完活動後趕返香港，現身醫院時阿佘不發一言直奔醫院，而阿佘喺同日下午嘅活動時接受傳媒訪問時，講起許紹雄都忍唔住灑淚，阿佘表示早知道許紹雄身體唔舒服，又指去年二人拍攝《正義女神》時，許紹雄身體狀況OK，面對好多對白都背得晒，而活動後阿佘亦臨時更改行程，趕回港探望，神情憂心，落車後急步入內。
阿佘與許紹雄曾於《絕代商驕》、《使徒行者》、《家族榮耀之繼承者》拍檔，後來Benz雄更與阿佘上契，以契爺契女相稱，阿佘曾喺綜藝節目讀出寫畀許紹雄嘅信，講過從許紹雄身上感受到久違嘅父愛。
