黎芷珊代家人公佈，資深演員許紹雄今日凌晨約02:30，因癌症引發器官多重機能衰竭安詳離世，離世時獲家人以及朋友陪伴，家人非常感謝近日朋友紛紛探望，亦有唔少朋友因身外地或未能現身而電話慰問，非常感激外界關心，後事將待家人再作公佈。
資深演員許紹雄於10月26號驚傳病危入院，令外界非常憂心，唔少圈中人陸續趕抵養和醫院見最後一面。許紹雄出身顯赫卻低調入行，從未靠家族光環，憑實力踏上演藝路，亦因當年佢係香港第一個駕駛名車（Mercedes-Benz）返工嘅藝員，故得「Benz雄」稱號。
許紹雄演技精湛，令每個角色變成經典，包括《新紮師妹》嘅「方鍾Sir」、劇集《使徒行者》「覃歡喜」等令佢事業走上高峰，佢於2000年拍《暗戰》飾演談笑風生嘅談判專家，更首度獲提名香港電影金像獎最佳男配角。
許紹雄喺1978年重返無綫電視，多年來參演作品包括《新紮師兄》、《蓋世豪俠》、《他來自江湖》、《再見亦老婆》、《笑看風雲》、《金裝四大才子》、《流金歲月》、《隔世追兇》、《阿旺新傳》、《天幕下的戀人》、《絕代商驕》、《My盛Lady》、三輯《使徒行者》、《誇世代》、《鐵探》等。
佢喺2012年嘅《萬千星輝頒獎典禮》中，同錢嘉樂、陳錦鴻、李成昌、鄭裕玲一同獲頒傑出演員大獎，表揚佢多年對電視圈嘅貢獻，之後一年亦遇上《My盛Lady》中香善男一角，首奪最佳男配角獎。
2014年佢參演《使徒行者》，表面上係社團叔父，實則係刑事情報科臥底，一句「笑住同你講嘅，唔一定係啱聽㗎」招牌對白，配合皮笑肉不笑嘅表情，令「歡喜哥」一角爆紅，更獲得《萬千星輝頒獎典禮2013》嘅最受歡迎電視男角色，以及《TVB馬來西亞星光薈萃頒獎典禮2014》嘅最喜愛TVB男配角與電視角色。
佢最後一套為TVB演出嘅劇集，係2024年拍攝嘅《正義女神》，佢去年現身《萬千星輝頒獎典禮2024》同溫碧霞頒發最佳男配角獎，將獎項傳承予新一代，許紹雄喺台上同溫碧霞鬥嘴，轉數相當之快。
許紹雄戲外係好丈夫好爸爸嘅代表，許紹雄同新加坡籍妻子龍嬿而結婚多年，係圈中出名愛妻號。早年佢經常香港、新加坡兩邊飛，只為與家人相聚。許紹雄之前一家人參觀順德清暉園，喺社交平台曬出合照，透露太太嘅猛料背景，清暉園原來係佢太太外家嘅祖業，有指清暉園最早建於明朝天啟年間，現屬於全國重點文物保護單位﹐曾接待過前國家領導人鄧小平。許紹雄更向傳媒透露太太係名門望族，不過佢謙虛話都係咁，冇咩大不了。
許紹雄喺今年6月帶女兒許惠菁回廣州舊居「許地」打卡，當時有網民留意到他行平路時頻頻喘氣，非常擔心其健康狀況。許紹雄最後一次公開露面係喺今年中秋節10月6號時，同女兒及一班老友羅樂琳等聚餐，大合照上許紹雄顯得悠然自得，完全沒有異樣。