許紹雄戲外係好丈夫好爸爸嘅代表，佢同新加坡籍妻子龍嬿而結婚多年，係圈中出名愛妻號。早年佢經常香港、新加坡兩邊飛，只為與家人相聚。
許紹雄之前一家人參觀順德清暉園，喺社交平台曬出合照，透露咗太太嘅猛料背景，清暉園原來係佢太太外家嘅祖業，有指清暉園最早建於明朝天啟年間﹐現屬於全國重點文物保護單位﹐曾接待過前國家領導人鄧小平。許紹雄更向傳媒透露太太係名門望族，不過佢謙虛話都係咁，冇咩大不了。
1992年太太以49歲高齡誕下愛女許惠菁（Charmaine），佢亦成為「廿四孝爸爸」，繼將新加坡嘅自家豪宅歸妻女名下﹐近年更大力支持愛女追夢做甜品師﹐打本700萬畀阿女開Cafe做生意﹐親自落場打點父愛滿瀉，阿女兩年開三間鋪頭，包括烘焙店、Cafe及茶餐廳，Benz雄年前已斥資2,300萬港元喺新加坡購入4,000呎大屋，歸入女兒名下做嫁妝。
女兒喺2023年同從事銀行業嘅男友Shane Sim拍拖七年拉埋天窗，分別喺香港及新加坡兩地舉行擺酒，兩場酒宴都獲大批圈中人到賀，其中香港嘅婚宴，杜琪峯、羅蘭、關寶慧、盧宛茵、馬德鐘、黃浩然、宣萱、江美儀、歐陽震華、羅子溢、陳豪、陳茵媺、余安安、劉丹、黃日華、苗僑偉、戚美珍、張兆輝、姚瑩瑩、江若琳、蕭唯展、林子善、潘嘉德、馮素波等群星到賀。可見許紹雄喺圈中人緣甚廣。
許紹雄近年同妻女從新加坡回流香港生活，許紹雄不時亦同女兒一齊拍片，不時見到佢同女兒喺4000呎複式豪宅內拍片，最近一次更係同女兒一齊打機。另外一條片更由女兒駕車入三門仔飲茶，Benz對於女兒生疏嘅車技甚為擔心，但係又未有大罵女兒，只係不時提點囡囡，Benz亦忍受到囡囡將坐駕駛到目的地先轉做司機幫忙迫車，父女間嘅互動，流露Benz慈父嘅一面。
6月許紹雄帶女兒許惠菁回廣州舊居「許地」打卡，當時有網民留意到他行平路時都頻頻喘氣，已經表示非常擔心他的健康狀況。早年佢出席一個平安鐘活動呼籲年青一代珍惜眼前人，花多啲時間陪父母，以免親人離開時留下遺憾。