許紹雄因癌症致多重衰竭離世，為世人留低唔少歡笑聲。Benz雄除咗劇集之外，多年來亦參與唔少電影演出，其中《新紮師妹》中扮演「方中Sir」，一幕電話響起幾乎被周聰發現而人急智生嘅教寫「Sir」字，就多年來一直係經典。
Benz雄雖然不時港新兩邊走，不過仍不時參與電視演出，近年同「叮姐」 佘詩曼 嘅「使徒行者》系列，扮演歡喜哥呢個大佬級臥底，就令唔少觀眾記憶猶新，佢亦因而同阿佘、林峯等建立深厚感情。
早前佢又於《家族榮耀之繼承者》同 陳靜 扮演一對忘年夫妻，展現搞笑幽默以外嘅深情一面。而Benz雄近月亦開始於社交平台拍攝影片，除咗同家人重返家鄉尋根，更多嘅影片係佢分享佢70多年來嘅做人經驗，如今重看猶如智慧老人向後世留低嘅警世箴言。