大型女生偶像企劃「偶像女生」（IdG）嘅一期練習生，成團以來一直密集式宣傳，走勻多個地區同大型活動落力獻唱。首團「IdG Bubbles」9月尾亦正式出道，首支主打歌《泡泡我！》於各大歌曲榜成績不俗，成為網上樂迷熱話，同時有望再掀本地女團熱。
「偶像女生」一期生早前於合體，包場舉辦《IdG刺激的旅程開步禮》同Fans近距離互動，即場公佈5大喜訊，透露第二支派台歌將於下月登場，又宣佈11同12月將再舉辦三場Mini Concert，以歌舞回饋Fans支持，首場Mini Concert將由「IdG Bubbles」擔大旗，趁機為年底各大音樂頒獎禮造勢。
而另外兩場就分別由人氣高企嘅Wingy同芷蕎作主打，佢哋將親自邀請其餘一期生同台演出，Wingy表示：「好興奮不過又好緊張，作為練習生有呢個機會好難得，我會畀心機練歌，希望到時可以Solo唱俾大家聽。」芷蕎亦表示非常期待，雖然忙於參與「偶像女生」練習同活動，但承諾會「加大油」：「希望到時一個人喺台上面唔會腳震，到時喺台上見！」
而當日「開步禮」中，主理人阿拔亦公佈「偶像女生一期生 第二隊」首位出道名單，成員圈圈事前完全唔知情，佢喺台上話：「好開心，但係我未反應得切，我哋之後繼續見面啦！」圈圈訓練期間表現出色，可塑性甚高，更已收穫唔少Fans：「我覺得自己好幸運，見到IdG Bubbles正式出道嗰陣，我已經好期待自己都可以正式出道，嗰時我仲講笑話要追上佢哋，終於到我啦！以後嘅路仲好長，我會繼續努力、繼續追夢！」現場又宣佈「偶像女生」二期生招募將於12月啟動。
