76歲資深演員許紹雄（Benz雄）於10月28號因癌症引發器官多重機能衰竭安詳離世，黎芷珊代家人悲痛公佈許紹雄死訊，噚日一眾圈中好友紛紛趕赴醫院見其最後一面。許紹雄彌留時一眾家人好友陪伴在側，唔少身在外地嘅朋友通過電話慰問，家人非常感謝外界關心，有關後事安排將稍後公布。
許紹雄喺圈中人緣甚廣，離世噩耗傳出後，眾藝人紛紛留言悼念，高海寧（高Ling）跟許紹雄戲內戲外情同父女，憶起二人往事一度泣不成聲，高Ling話消息好突然，好幸運遇到呢位好前輩，私下都叫佢「老竇」。
高Ling喺約兩個月前曾一齊食飯，仲記得當日好開心，佢嘻嘻哈哈又叫好多好嘢食，高Ling今日收到許紹雄女兒許惠菁（Charmaine）嘅訊息，指「爸爸希望大家記住佢快樂嘅形象，同開心嘅笑臉，呢個係我哋對老竇嘅印象，大家將呢個形象記喺心裡面」。
馬國明讚Benz係一個好前輩，對新人好好，只要Benz覺得對方係有心學做戲，係會將所有嘢教俾新人，對於Benz離世感到好可惜，馬明亦覺得好幸運能跟Benz喺多套劇裡面合作。
黃智賢噚日有到醫院探望Benz，深信好友有聽到，二人相識30幾年，由出道一直獲Benz照顧，黃智賢指Benz係不可多得、無可替代嘅一個好演員。羅子溢亦覺得好心痛，透露太太楊茜堯目前喺內地開工，得知消息後好傷心，羅子溢指Benz為人太nice，呢行好多人係Benz嘅朋友，大家都好尊敬佢。
