資深藝人 許紹雄 星期二度晨因癌症引發多重機能衰竭離世，從影多年嘅佢其實家境不俗，早年由廣州移居香港後，70年代投考首屆TVB藝員訓練班，當年已駕駛名車返工嘅佢，好快就被同學冠以「Benz雄」稱號。
後來投入演藝發展，參與《歡樂金宵》演出之餘亦演出過多部經典劇集，由當年《新紮師兄》、《隔世追兇》到近年嘅《家族榮耀之繼承者》、《使徒行者》系列、《陀槍師姐2021》、《My盛Lady》等。
當中歡喜哥既奸詐又機關算盡，就為佢帶來最佳男配角獎，以及傑出演員獎、仲有最受歡迎電視男角色多個榮譽。Benz雄同叮姐 佘詩曼 同為臥底合作無間，戲外亦一樣感情深厚，兩人早已上契成為乾父女。
除咗事業發展不俗，Benz雄家庭一樣親密，1992年迎娶新加坡籍太太 龍嬿而 ，兩人育有一女 許惠菁 ，近年不時同囡囡於社交平台拍檔現身，年前囡囡出嫁仲盛大於兩地辦婚宴，大批圈中友好齊齊到賀，非常熱鬧。
許紹雄 家世顯赫，出身自廣州四大鹽商之首，同慈禧太后、名作家魯迅都有關係，太太同樣出身自名門望族，不過Benz雄就自嘲係族中枯枝、乞兒，一貫幽默，又指做人至重要對得住自己，食得瞓得先係首要之重。
早於新加坡置有巨大豪宅嘅Benz雄與太太，近年隨愛女、女婿由當地返港居住，早前仲一家返鄉遊覽，影片中佢大汗喘氣，就被懷疑身體情況一般。
