近年潛心轉型期望成為新生代打女嘅 鄧月平 最近一身真功夫打出好成績。Larine8月越級挑戰52-58kg組別，以第一名資格代表香港出戰馬來西亞ITF亞洲賽。近日佢又代表香港出戰「第十一屆布城跆拳道挑戰賽2025（Putrajaya Taekwon-Do Challenge 2025）」，首次參加亞洲賽就勇奪A18女子黑帶48公斤以下組別季軍，為港隊摘下銅牌。
今次比賽匯聚亞洲多個地區精英選手，年初考獲黑帶一段資格嘅Larine穩定發揮，對戰時戰術靈活、腿法有力。佢賽後指：「跆拳道比我以前練嘅搏擊項目更著重腿部控制同臨場冷靜，今次比賽令我學識點樣喺壓力下保持專注。」 
中國香港傳統跆拳道總會主席兼隊伍總教練李安東稱，港隊於跆拳道強國馬來西亞取得多面獎牌，成績令人鼓舞，除鄧月平外，港隊其他成員一樣表現出色，多位成員力拼下得獎為港隊帶來佳績。 
而Larine就話能代表香港出戰已係莫大榮幸：「今次希望盡力而為，馬來西亞選手實力非常強，所以攞到銅牌已經非常開心！」又感謝教練Bruce培訓指導：「呢段時間嘅訓練令我喺心態上成長咗好多，由演員跨界成為運動員，心理質素同體能都得到鍛鍊。」 
Larine近年醉心武術，已參與幾部動作電影，即將排期上畫，正式轉型成為新生代動作女演員。佢話：「演戲係我無法捨棄嘅夢想，但喺成為武打演員嘅過程中，我發現自己有另一種熱血同力量。」 
佢仲指踏上武術之路，源於4年前拍攝嘅一部動作電影：「當時時間同budget都非常緊張，我提早接受密集訓練，好在細個學過瑜伽、中國舞、泰拳、跆拳道，所以都有基本功底。拍完之後好多武師前輩鼓勵我要繼續打、繼續練。」之後佢就陸續學習詠春、兵器訓練，更遠赴武當山閉關學習武當劍術，持續提升實戰能力，立志成為專業動作演員。
