第38屆東京國際電影節 日前喺六本木開幕，而由 張吉安 執導 范冰冰 許恩怡 與 白潤音 等主演嘅馬來西亞電影《地母》，就入圍主競賽單元，同時亦於當地舉行世界首映。
《地母》出品人、製片以及一眾台前幕後團隊，一齊踏上電影節紅地氈，Natalie趁電影節機會同團隊聚舊非常開心。佢同范冰冰仲不約而同以黑白色圖案禮服亮相。Natalie話：「我哋完全冇夾過！唔只同冰冰姐，仲有細佬、導演都好襯，不過我同冰冰姐實在太撞色，所以唔可以企埋一齊，靠導演企喺我哋中間，但成個過程同大家一齊感覺好親切。因為戲入面大家都好樸素，今次可以一齊打扮靚靚，冰冰姐好有能量，加上佢嘅經驗，就好似一個大家姐咁，我哋都好信任佢。」
Natalie同范冰冰自去年拍攝《地母》後，今次再度碰面感情依舊，大家有講有笑，回想當日拍攝點滴，Natalie就話：「估唔到自己能夠連續3年出席東京電影節，今次係第二次同張吉安導演一齊參與，就好似同家人去旅行咁開心。大家都係第一次睇《地母》，喺大銀幕睇呢套戲，燈光、攝影、剪接、服裝，感覺真係好震撼，仲令我回想返拍攝時嘅情況，好多蚊、好多泥，哈哈…」
