Coffee喺28號出Post大叫：「我嚇到失眠呀痴線，而家個心情都仲未平靜到。」佢指當晚自己為朋友慶祝完生日，11點45分由中環揸車返屋企，12am去到屋企嘅迴旋處位置準備落停車場嘅時候，座駕突然無故自動急剎：「我仲chok到條頸，好彩冇Chok到個肚。」
但最令Coffee心驚嘅係：「我望住架車個Screen，顯示有個人好近係我架車前面行緊，仲轉身望一望我跟住又繼續行走，但架車出面係空地同埋完全無人架。」而呢個情況原來已唔係第一次發生。Coffee表示上個月去完朋友屋企，載住囝囝返家時，喺同一個位置發生同一件事：「架車無啦啦急剎跟住個screen又顯示有人係前面行過，但前面又係空地一個人都無…當時彥彥仲問我係咪有怪獸我仲安撫佢。」
其實Coffee呢款座駕品牌所出嘅車，自推出至今喺海內外都有唔少用戶發生過類似嘅「靈異事件」，更有外國司機喺空無一人嘅墳場，車上屏幕顯示感應到有人出現並停留喺車前。
有網民表示：「同一個地方發生2次真係難怪會覺得邪」，Coffee就話：「係呀，仲要條路我日日都會經過，兩次發生都係呢個時間呢個地點」不過有網民以科學分析安慰Coffee，表示可能係「Sensor壞」，或者係「如果只係特定一個地點sensor 感應到嘢，就可能嗰個地方有燈光/超聲波/紅外線發射令架車以為有物件令訊號反射。」令Coffee都話：「好啦，我舒服啲啦」。
