容天佑早前與拍拖8年嘅女友扶天恩（Winnie）求婚成功，事前細心問問女友父母意見，得到家長同意，先籌備求婚，容天佑日前完成傳統中式過大禮儀式。
天佑公開當日靚相，見現場擺滿鮑參翅肚、大大盒心型花膠扒、重磅金器及耀眼鑽飾等，未來外父外母非常滿意，而且過大禮儀式跟足傳統。天佑表示二人都鍾意小朋友，希望生2個，自己應該唔係「虎爸」，只要仔女開心成長就可以。
容天佑喺2011年參加《功夫新星》獲第3名，18歲再投考藝員訓練班加入TVB。容天佑簽約TVB後，拍過不少劇集包括《法言人》見習師爺「Tony仔」、《逆天奇案2》飾演O記警員口水言等，佢本月初求婚成功，二人更影黑色潮味婚紗照，接住落嚟要忙婚禮嘅事，容天佑相信一切都會順利。
