現年75歲嘅元華近年嚟喺加拿大湊孫為樂，偶爾會做幕前演出，享受半退休生活。講到元華演藝生涯中，最令一代人難忘嘅角色，一定有喺電影《功夫》嘅「包租公」，佢同「七小福」師姐元秋飾演嘅「包租婆」呢個組合多年嚟深受觀眾喜愛。
近日元秋細妹文雪兒就喺社交平台分享，元華為元秋慶祝生日嘅聚會相，寫道：「 #包租婆 生日快樂 #包租公 專程到賀 #元秋 #元華」相中可見，元華精神奕奕，氣息極好，包租公、包租婆嘅同框，令網民非常開心同驚喜，仲讚二人睇落一啲都唔似年過70添！
雖然元華嘅影視作品減產，不過唔少喺加拿大生活嘅華人經常偶遇佢，仲讚佢為人親切，要求合照永無托手踭！而元華同一眾同門感情極好，之前有出席聚會，同元秋、袁和平、狄龍為元彪慶祝生日。
