吳鎮宇深信佛教多年，近日佢被野生捕獲喺雲南西雙版納嘅景洪市大金塔寺出現，參加傣族佛教供養儀式，17歲囝囝費曼亦有同行。
片中所見鎮宇赤腳捧花行走，虔誠祈福，而留有一頭長曲髮、頭戴Cap帽、身穿深色上衣嘅費曼就跟隨其後。費曼生得高大、身形壯碩，同爸爸身形有強烈對比，被誤認係當地人，又被網民話係「巨人」，有人講笑咁話「吳鎮宇小心翼翼、戰戰兢兢，費曼心不在焉、嗤之以鼻」，形容費曼嘅從容隨性態度。
鎮宇同費曼呢對父子自從多年前參加內地親子綜藝節目《爸爸去哪兒2》後，一直備受網民關注，隨住費曼越嚟越大個，亦不時喺網上直率幽默同網民互動，費曼更會開爸爸玩笑，帶俾大家唔少笑料。
