譚詠麟近年忙於遊走各地做巡迴演唱會以及為明星足球隊出賽，呢日佢為12月舉行嘅澳門演唱會綵排。校長就話，其實自己去到每一站都想設計一啲特別嘢，呢次尾站亦有特別設計歌單向歌迷送驚喜，就好似喺《我愛雀班》呢首歌，佢就會加入一段普通話歌詞，唔同地方嘅歌迷可以聽得投入開心。
呢個巡迴演出歷時三年，每一站都有好多難忘時刻，特別係上一站惠州場遇上颱風來襲，校長喺大雨下同歌迷唱足幾個鐘，佢都話為咗回饋歌迷嘅熱情支持淋雨都係濕濕碎。不過校長就話，上次去大連踢波，因為當地氣溫下降，酒店空調變成暖氣，所以自己因為太暖而焗親。至於幾時會返香港開騷，校長就話好快有消息宣布。
校長呢次跑巡演都多咗新習慣，就係為提前去開騷嘅地方遊覽同食好嘢，例如去博物館、歷史景點等，體驗當地文化。校長仲遇過粉絲，綵排呢日所戴嘅Cap帽就係粉絲送嘅。
