許廷鏗（Alfred）、李幸倪（Gin Lee）、吳若希、張馳豪、泳兒等近百位歌手出席一個電台頒獎禮嘅記招，適逢萬聖節將至，一眾歌手悉心打扮現身，講到《聲秀》決賽舉行在即，泳兒自認喺最後衝刺時間要化身魔鬼導師，對自己學員柯雨霏（Ophelia）非常有信心，盡力逼出Ophelia嘅潛能。
吳若希曾跟前輩Benz哥許紹雄合作，得知Benz哥離開，佢覺得好難過，知道Benz哥係希望大家開心，佢錫嘅人同錫佢嘅人都會保持微笑面對，始終有日大家會喺唔同嘅空間去見到面。
Dear Jane所屬嘅唱片公司歌手拉隊出席，以行動「破冰」成為焦點，呢日焦點就係梁釗峰首次回應分手風波，佢盼望專注工作拒再談感情事。
許廷鏗自組公司做獨立歌手不經不覺4年，早前相約歌迷打匹克球（Pickleball），許廷鏗笑指推介做運動比推薦美食更健康，通常好食嘅嘢都唔係最健康。同場嘅張馳豪以帥氣機師造型亮相，話可惜《飛常日誌2》未有搵佢演機師，佢好恨講經典對白！
