《聲秀》終極8強已經誕生，8位學員將展開《聲秀決賽終極聲戰》，以廣東歌進行最後一戰，於11月2號晚上喺翡翠台直播。進入最後倒數階段，8強學員甄敏芳（Jenny）、蕭凱恩（Michelle）、胡子貝（Matt）、周智敏（Emily）、林潔心、穎喬、馮熙燮（Ryan）及柯雨霏（Ophelia）為決賽預熱及進行拉票，輪流獻唱大騷實力。
《聲夢傳奇》師兄師姐冼靖峰、孫漢霖及林沚羿現身撐場打氣兼頒獎，「學員互選聲秀冠軍」得獎者係Matt，佢感謝七位學員厚愛，「現場觀眾最撐學員」則由馮熙燮獲得最高票數當選，而冼靖峰分享過來人經驗。
重溫《聲秀》精彩比賽
Emily覺得心態調整好重要，希望自己做到最好，穎喬及林潔心抱住平常心迎戰，Ophelia都話準備嘅過程好開心，皆因自己好喜歡嗰兩首比賽歌，Michelle就好期待呢次有機唱唔同曲風嘅歌，而Jenny每日都同2位學員Ryan同子貝一齊接受導師蘇永康嘅高強度訓練。
