資深藝人甄志強早於90年代入行，憑高大俊朗外表，讓觀眾留下深刻印象，2009年一度淡出幕前，轉戰商界攻深圳及上海搞飲食業，其後再回流返港拍劇。太太方心媛今日發訃文稱丈夫甄志強於10月21日離世，追思會暫定於11月16日在香港舉行，而盛傳甄志強死因係打波後心臟出事猝死。
甄志強一向身體健康，不時喺社交平台上載做健身、跑步及教人打高爾夫球嘅影片。今日傳出甄志強喺上海打波，疑因心臟出問題，緊急送院搶救，由於甄志強離世相當突然，親友悲痛不已。
甄志強生前係運動健將，曾參與唔同體育運動，試過代表香港出戰世界錦標賽，甄志強曾於1989年成為香港跆拳道代表隊（中量級別）首席成員，同年底代表香港參加於韓國舉行嘅「第九屆世界跆拳道錦標賽」。 甄志強於2000年考到高爾夫球教練牌，2006年被推選入香港職業高爾夫球（HKPG）見習教練，有傳甄志強嘅高爾夫球啟蒙老師兼前女友趙金卿，甄志強與年長23年嘅名媛趙金卿曾有一段情。
甄志強早前接受著名製作人楊紹鴻網上訪問，罕有談及舊愛趙金卿，當年由於二人地位及年齡有差距，甄志強曾被指「食軟飯」，不過佢覺得「我拍拖有咩問題呢」，承認曾經好唔開心，甄志強仲為自己平反稱當時收入唔差，「當年交嘅稅項接近20萬」。
甄志強憶述當年戀情曝光係因有次被女友激嬲，甄志強一鼓作氣決定同女友去社交場合，決定公開戀情，甄志強坦認因承受壓力太大，最終佢與趙金卿戀情無疾而終。
