蔡潔早前應澳門政府邀請擔任一個健康工作坊嘅瑜伽導師，唔少人對蔡潔教瑜伽感到驚訝，當日蔡潔先後教各人呼吸方法、熱身及示範拜日式，表現專業，完成後唔少學員爭取同蔡潔老師合照，原來今次係蔡潔考取瑜伽導師牌後首次公開擔任導師授課。
蔡潔雖然忙於拍攝新劇《風華背後》，但佢仍盡量抽空練習及準備今次課堂。對於今次去澳門公開指導瑜伽課，蔡潔事前已好期待同藝人劉畊宏及幾位唔同國家身心靈方面嘅達人與大師，一齊出席呢個健康板塊分享，蔡潔都覺得好榮幸。
蔡潔感謝好朋友Candy幫手一齊授課，開始前有啲緊張，但一按住張瑜伽墊就唔記得咗緊張，好沉浸喺過程當中，同學都好投入好享受整個過程。蔡潔從細就跟媽咪學習瑜伽，今次第一次公開授課，蔡潔自覺表現尚可接受，事後睇網上評價都讚佢聲線好溫柔，好適合做瑜伽導師，最搞笑係見到有網友話導師好似蔡潔。
蔡潔認為今次讓大家見到演戲以外唔同嘅一面，實在是好機會，暫時蔡潔唔會放下演藝工作去開班授課，因為佢除咗忙拍劇之外，又出版漫畫書兼發展漫畫周邊，年底更有漫畫主角crossover展覽，所以蔡潔話教瑜伽就隨緣。 近日蔡潔拍攝劇集《風華背後》能夠跟一班崇拜嘅演員蔡少芬、譚耀文等合作，呢啲前輩真好友善，令佢好開心，每次開工都有心跳感覺，反而擔心唔知前輩覺得佢做唔做到，不過大家合作得好開心。
