「黑哥」姜皓文與太太殷寧近日以旅行體驗生活預祝二人生日及結婚26周年。 由於二人早前喺潮汕工作時，被當地古蹟、廟宇及非遺工藝深深吸引，決定遊走潮汕作為佢哋嘅預祝之旅，獲當地朋友熱情招待充當導遊。
黑哥兩公婆喺短短一星期品嚐當地美食、體驗烹煮潮式食品、潮式刺繡、參觀牌坊街、開元寺等多個著名景點外，更有幸獲得國家級非遺文化潮州手拉朱泥壼大師謝華老師親身接待，並指導製作茶具。
兩人又參與潮州地方藝術民間廣場舞蹈 「英歌」，喺面上試畫梁山好漢臉譜、 穿上特色服裝、手持英歌槌，學習英歌舞嘅步法，體驗英歌舞嘅粗獷豪邁。黑哥感謝朋友悉心安排，整個旅程學到好多新事物、體驗多種非遺工藝、又認識到啲新朋友，此行令佢眼界大開。
黑哥喺外埠工作中度過生日，酒店及劇組特意為佢製造驚喜送祝福，預早喺酒店房間作生日佈置、並準備禮物同蛋糕等，黑哥一行入房已暖在心頭，既驚喜又好開心，佢又指生日開工喺好意頭，多謝大家安排，呢幾日亦收到好多祝福。
