金馬影后舒淇憑首部執導嘅電影，勇奪釜山影展最佳導演，呢日舒淇連同主要演員邱澤、9m88、白小櫻、林品彤等帶住呢部揚威國際嘅處女作返到台灣舉行記招同首映，見慣大場面嘅舒淇直認緊張，佢話喺外國可以話大家睇唔明，但返到台灣，感覺似「醜婦終須見家翁」。
電影以舒淇童年生活為藍本，拍攝過程難免有啲場口觸動情緒，佢話當自己勾起匿喺衣櫃嘅畫面，就會覺得好恐怖。佢話電影可以畀每位勇敢嘅女孩，希望可以走出一個美好嘅末來。
舒淇嘅老公馮德倫導演資歷相對豐富，但係舒淇拍攝過程中就冇請教老公意見，佢話因為大家路線唔同，老公拍商業電影。拍攝完成後，舒淇都有畀老公欣賞，老公都話值得睇，但唔明白點解有男人可以咁。舒淇就答老公一句「你唔會明，你呢啲外國人」。邱澤第一次同舒淇合作，佢大讚舒淇有一個其他導演少有嘅特質，就係體貼演員，令演員有安全感。
