有「幽默祖師」之稱嘅馮淬帆，憑誇張肢體語言與獨特語調，成為港產喜劇代表人物，馮淬帆外型高大斯文，多年來卻堅持不婚主義從未有結婚打算，一心寄情於影視圈工作，努力為演藝事業打拼，由其為人重情重義，喺圈中廣結善緣，馮淬帆對恩師楚原提拔，更係一生銘記，2018年得知著名導演楚原獲頒金像獎終身成就獎，大弟子馮淬帆立即回港擔任頒獎嘉賓，於台上感激師傅嘅知遇之恩，真摯之情，溢於言表。
馮淬帆曾於1981年與女星曾慶瑜拍電視劇《烽火飛花》撻著，最終因個性不合分手；而馮淬帆曾對外坦言阿姐汪明荃係其初戀女友，而當時阿姐正與馮淬帆好友鄒世孝拍拖，年少氣盛嘅馮淬帆直接橫刀奪愛，「我們交往過程一直很公開」，二人相戀時廿多歲，佢有感阿姐未必願意「一直待在他身邊」，兩人便決定和平分手。
馮淬帆早年接受訪問曾講過「老伴要來做什麼呢？女人容易老，我勸女人嫁老公，最好嫁比自己大10幾歲」。馮淬帆解釋自己見唔少朋友嘅老婆婚後老得快，外型睇落變成男方家姐，認為呢種夫妻漸行漸遠係遲早嘅事，同時佢自知個性孤僻，唔容易與人相處，自嘲如果走進婚姻，可能每日都會同伴侶嘈交。
雖然馮淬帆對愛情唔抱任何希望，堅拒說不，但佢心裡其實好重情，就係佢同影壇恩師楚原嘅師徒之情，馮淬帆1965年主演數部麗的映聲劇集後獲邀參演其首部電影，由其影壇恩師楚原執導嘅「黑玫瑰」系列電影第三部《紅花俠盜》，從此投身影壇，成為楚原首徒。
馮淬帆與楚原由於二人年齡只係十年之差，多年亦師亦友，早年第37屆香港電影金像獎中，楚原叔獲頒終身成就獎，馮淬帆親自將獎項頒予恩師，佢一直難忘楚原提拔經過，對呢份知遇之恩鉻印於心，視楚原為永遠嘅恩人及恩師，教識佢第一次執導電影。
馮淬帆當年喺麗的做演員兼做配音演員，啱啱夠食兩餐飯，有日楚原導演想搵佢演戲，將佢帶入電影界，馮淬帆大概拍兩三套戲後，自薦想做導演，當時楚原問：「𡃁仔你真係想做導演？好啦，我未用過副導演，你跟住我啦。」
馮淬帆記得楚原常言「少年不識愁滋味，為賦新詞強說愁」，警惕馮淬帆別不滿現實自怨自艾，做人要努力奮鬥，對楚原教誨一直謹記慎行；馮淬帆亦感慚愧，就係自己喺導演路上冇一部佳作能讓恩師楚原引以為榮。
馮淬帆喺台上眼泛淚光表示：「由嗰陣時開始，佢唔只係帶我入電影界嘅恩人，仲係我嘅恩師，我永遠嘅師父。最後一樣我仲要講，直到1974年，我可以執到第一套電影《香港屋簷下》，第一日，楚原師傅嚟到現場，我第一個鏡頭係佢幫我擺機位，所以我永遠記住，我永遠嘅師父，楚原導演。」
