台慶劇《巨塔之后》大結局喇！ 吳若希 喺社交平台開心分享，劇組台前幕後相約飯聚睇結局，而呢餐飯仲有一個特別嘉賓，就係古天樂！
Jinny撰文表示：「今晚巨塔之后 大結局飯聚竟然有特別嘉賓古生～～～同古生影相都不是重點，重點係可以同宣萱同古生一齊影～今個Halloween。好幸福啊！！！！」字裡行間都掩蓋唔住佢變小粉絲嘅興奮心情。古仔同宣萱過往合作多次亦數度搭成CP，二人交情都非常好，所以網上都有唔少「古宣」粉，鍾意見到二人同框。Jinny都唔例外，佢就話：「佢哋兩個真係好襯呀！！！！淨係見到佢兩個都覺得好幸福啊～」
呢個Post一出，唔少網民都話：「贏咗99.9％古萱cpf」、「好羡慕你！」、「追星成功」，Jinny呢次真係成為追星勝利組！
