陳凱琳（Grace）多年以嚟一直fit爆，即使已係三子之母，身材絕無走樣，毫無師奶味， 更不時喺社交網分享吃貨影片，見佢大啖大啖品嚐各種美食，噚日黎耀祥及老婆梁耀蓮（Julia）去咗好友鄭嘉穎屋企打邊爐，Grace繼續影住自己食嘢，老公嘉穎就同祥哥傾偈敘舊。
嘉穎與祥哥私下好老友，不時邀請祥哥一家人到家中作客，今次嘉穎準備一枱美食招待，把酒言歡，Grace事前亦準備甜點一齊享用，祥哥更親自夾咗一顆雲吞畀Grace，見佢一邊食一邊大讚，眾人開心飲飽食醉。
祥哥同嘉穎曾合作拍劇集《強劍》及《飛短留長父子兵》等，祥哥曾喺清談節目《雙祥見》爆自己同Grace拍《名門暗戰》時，嘉穎喺隔籬廠拍劇，笑指嘉穎當時趁機探班搵祥哥同曹永廉，實質係暗地睇中Grace，覺得嘉穎嗰陣已發現Grace係好女仔，後嚟嘉穎同Grace合作拍攝《殭》，二人前往荷蘭取景有更多時間相處，便成就呢段美好姻緣。
