演藝界接連線痛失兩位受人敬重嘅前輩，唔少圈中人連日來都緬懷同許紹雄仲有馮淬帆兩位前輩昔日嘅合作點滴。導演 陳詠燊 自2000年起，先後同許紹雄合作8次，包括三集《新紮師妹》入面嘅方鍾Sir；《這個夏天有異性》中阿Sa熱烈求愛嘅爸爸；《玉女添丁》中陳冠希嘅富商父親；《煎釀三寶》中大小說家許冠文嘅助手；《追擊8月15》中嘅盲眼逃犯，與及《我家有一隻河東獅》中嘅風流詞人蘇東坡。全部都係 馬偉豪 導演嘅喜劇。
Sunny指每次同Benz雄合作，對方都會將70分好笑嘅劇本，演成90分，形容佢為團隊嘅定海神針。演喜劇困難，但Benz演得極為出色，更認為佢演喜劇嘅技術絕對係香港最頂級。Sunny又指Benz雄係偶爾會爆肚嘅演員，而命中率極高，因為佢唔會亂爆，而係會完全了解劇本同對白過後，喺細節上爆出出色嘅Highlight；而大部份時候，佢都將劇本消化，再按創作者嘅原意設計出適合嘅節奏同語氣，去將喜感帶出。近幾日網絡瘋傳「Sir字有得寫」一場經典，都可見Benz雄毫無擠眉弄眼，認真演出「發現自己講錯話」同「鎮定地補鑊」，係真正嘅四両撥千斤。最後，Sunny多謝Benz雄留下嘅演技教科書：「我哋會活到老學到老，繼續努力。多謝你的方鍾Sir，這三個字幫了我的事業太多太多，無盡感激。」
而馮淬帆嘅離世亦令唔少圈中人感婉惜不捨，同馮淬帆相識幾十年嘅劉丹，指10月30號晚先傳短訊畀對方，想通知佢許紹雄離世一事，當時馮淬帆回覆指已經知道，因為許紹雄太太已經電話通知。最後馮淬帆嘆氣謂「唉，人生就係咁。」丹爺知道老友生病已一段時間，近月已轉好，仲指有導演想邀請拍戲，丹爺話當時仲戥老友開心。
同樣同馮淬帆老友嘅仲有 夏雨 ，佢坦言收到消息後，有種無法忍受嘅悲痛，因為馮淬帆係最好嘅朋友之一，大家相交超過大半個世紀。每次去台灣都必定會見面，年中到當地時先知道對方因肺炎入院留醫兩個月，遺憾未能見最後一面。佢讚故友係一位好有堅持、好有信念同好有才華嘅人，為影視圈創造無數經典。
此外，羅永昌導演亦分享同覲哥昔日合照，當中包括一張佢同覲哥、許紹雄、劉丹以及杜琪峯一齊探望前輩 陳有后 嘅合照。羅永昌指同覲哥於2006年喺電影《每當變幻時》合作時結緣，舊年11月曾經喺台北見面，昔一別成永訣。
