韓國第16屆大眾文化藝術獎頒獎典禮呢日喺首爾國立劇場舉行，呢個獎項係當地政府所頒發嘅大眾文化藝術領域嘅最高榮譽，表揚對韓流推廣同產業發展有貢獻嘅重要人員。今年最高榮譽嘅文化勳章得主，分別係獲得銀冠嘅金海淑、獲得寶冠嘅李炳憲同鄭東煥，而G-DRAGON則成為玉冠文化勳章嘅其中一位得主，同時GD亦係今年最年輕嘅文化勳章者。
心情相當愉快嘅GD，喺接受主持訪問時，就誤以為現場正落初雪，主持就笑指都可以咁形容，仲話GD呢個形容方式相當有藝術感，仲反問GD現場係咪真係好似落緊雪咁，當GD知道自己擺烏龍，現時只係秋季時，即尷尬表示：「真可惜」對於能夠得獎，GD話最開心嘅人係佢，其次就係佢嘅fans同父母呀。
寶冠得獎者李炳憲，就表示呢次得獎並非佢個人嘅功勞，佢指自己要向每一位工作人員致謝。而銀冠得獎者金海淑，直言非常值得光榮，同時佢亦檢討自己有冇資格拎呢個獎，佢表示自己會繼續努力做得更好，好好咁接受呢個獎項。
另外，「總統表彰」得獎者今年共有七組，當中金美京、李敏鎬、李姃垠、及組合東方神起均有現身領獎。而獲頒「國務總理表彰」嘅包括朴寶英、朴海浚、朱智勛等，而「文化體育觀光部長官表彰」就包括池昌旭、秋英宇、女團I-dle等都有盛裝赴會領獎。八年前已經曾獲此獎嘅朴寶英，就表示八年後好開心可以再獲此獎，同時會繼續努力向大家展示自己更好嘅一面。