中聲唱將 趙浚承 早前化身為一名老翁，以90歲高齡拍攝完賽後首支單曲嘅MV，當中仲有唔少部份由佢參與同構思，呢日MV仲邀請好戰友 曹越 擔任女主角，一齊共舞非常浪漫。而Gary嘅老妝亦係由特效化妝師老友出手完成。
整個妝由拍攝兩星期前先經過掃瞄，當日更由凌晨開始準備，前後足足花咗4個鐘先完成。完成呢個外貌已經夠攰，但係Gary亦因為呢個特技化妝唔能夠亂郁，搞到只可以食粥充飢，見到工作人員嘅餐點口水都流埋呀。
之後佢再變返俊俏樣繼續拍攝，原來先苦後甜係佢一早考慮，因為焗足大半日，汗水流唔停，再轉返正常妝之後自然面都尖啲啦。
Gary又話MV由中年到暮年，原因係希望向另一半告白，即使已老態龍鍾，都仍然會記得同愛侶嘅甜蜜回憶，當中內容更係自己對太太嘅愛意表白，太太仲甜指係聽過最好聽嘅作品呀。
