林正峰經常喺社交平台拍片分享工作日常而備受網民喜愛，仲將身兼多職嘅佢封為「打工皇帝」。早前阿峰宣布自己前往內地拍戲，首次擔正做男主角，本來係件開心事，佢竟然出師不利遇上連環黑仔事件！
阿峰以「22小時跑4城巿：倒霉香港藝人趕通告的一天」做主題，喺片中透露大清早起床為前往髮型屋將金髮染黑，點知喺出門時發現座駕車胎漏氣，自行急救後成功捱到去車行補胎，到達髮型屋時已遲到，完成造型要頻撲返家執拾行李同化妝，趕去深圳。
阿峰完成深圳活動後即刻飛往北京，再搭2個鐘頭車去河北，抵達時已凌晨2點幾，車費高達600幾蚊人民幣！之但係更慘嘅事在後頭，阿峰到達賓館後，發現門口竟然被鎖上，前台職員已瞓著。
阿峰喺天寒地凍下等待，終於成功入住，結果賓館冇熱水，令人睇到都覺得坎坷又崩潰！阿峰就話：「為甚麼我一直在流鼻涕？上來之後我發現它的水是很涼的，我想要打電話下去，然後我發現這裡是沒有電話打下去，基本上他們前台人都在睡覺，我真的求助無門，我就放棄了。」最後佢只能自我安慰，至少房裡有暖氣，唔少網民睇完阿峰嘅分享都覺得佢好陰公，紛紛為佢抱打不平，為佢打氣「拍戲加油」，同埋叮囑佢「要注意保暖」。
