一代武打巨星劉家良師傅喺2013年離世，靈柩於大嶼山寶蓮禪寺海會靈塔火化，其後骨灰安放於沙田寶福山。近日有報道指寶福山發生多宗名人骨灰被盜事件，劉師傅生前妻子翁靜晶喺11月3日嘅直播頻道證實「劉師傅嘅骨灰被人偷咗」。
翁靜晶喺直播透露8月下旬收到寶福山職員電話，懷疑劉師傅嘅骨灰龕被盜，希望佢授權警方打開龕位調查。身處外地嘅翁靜晶初時覺得係詐騙電話。直至向警方查詢後，先知道事件屬實，並發現龕內只剩一本劉師傅生平紀念冊同兩塊布，兩個盛載劉師傅骨灰嘅骨灰盅不翼而飛。
翁靜晶提到當年喺龕位留咗一張寫條，寫上「這處是劉家良墓地，沒有值錢物品，只有骨灰，請不用盜走」，結果連呢張字條亦同樣消失。警方仍然調查案件當中，至於贖金方面，翁靜晶斷言堅拒付任何贖金，佢認為支付贖金係助長歪風，佢話「有錢寧願幫助生人，將我對劉師傅敬重，去幫年紀相約嘅人」，坦言同兩位女兒一樣好傷心，亦唔抱希望尋回骨灰，會視作劉師傅係為國家上戰場捐軀。
