適逢本年為一代武術宗師李小龍85周年誕辰，香港舞蹈團將於11月底公演大型舞劇《武道》，作品以李小龍武術精神與人生為藍本，透過舞蹈勾勒其精神旅程，呈現佢從少年意氣嘅街頭生活，到荷李活電影巨星嘅傳奇經歷，同時為舞團45周年誌慶揭開序幕，而舞台王者郭富城 （Aaron）更親筆書法題字。
李小龍女兒李香凝（Shannon）及其女兒 Wren Keasler將專誠來港欣賞舞劇首演。該舞劇糅合武術與舞蹈、多媒體舞台美學與爵士樂元素嘅跨界新作。創作從李小龍武術動態入手，捕捉其身體流動感與力量，將李小龍武術精神及哲學化為舞蹈嘅結構及美感，最終呈現來自東方、來自武術嘅審美，舞者們將以截拳道、空手道、雙節棍等武術元素，結合粵劇身法、詠春中線與水墨意象，演繹李小龍剛柔並濟，帶出尋找自我之「道」嘅勇氣。
香港舞蹈團邀請舞台王者城城參與是次舞劇獻出親筆書法題字，城城分享創作概念：「我喺書寫『李小龍』三個字前，隨筆咁寫『拳』及『道』兩個字，一邊寫一邊有許多想象，漸地浮現出『截拳道』三個字，於是就聯想到呢門武術與李小龍嘅關係，開始執筆細寫『李小龍』呢三個字。」城城以李小龍展示武術嘅站樁姿勢為形態，特別用兩種毛筆嚟寫，希望透過唔同筆法，融合出另一種書法風格。
城城認為舞蹈與書法融會貫通：「我都係一個舞者，我希望我嘅書法可以展現一種舞蹈形態，每筆每劃都似躍動於紙上嘅感覺，盡力達至『歌畫交滙，字舞相隨』境地。每一支舞蹈都需要舞技，跳出無限肢體語言，武道亦然。」
城城一向於舞台表演力求創新，曾喺2024年演唱會特別加插一個環節，一邊跳舞一邊潑油彩作畫，城城本身都喜歡睇舞劇、仲話如果遇上適合題材，時間又配合到，佢都考慮參與香港舞蹈團演出，但係一切要睇緣份。
