武打巨星李連杰今年8月透露入院切除腫瘤，經過一段時間休養後已回復精神，連外型顯得「回春」，佢精力充沛喺多個省市推廣「功夫舞」。近日內地社交平台瘋傳李連杰早前入院換咗一位意外身亡嘅年輕僧人「秋風」嘅心臟，謠言四散，仲講得似層層，李連杰日前就喺社交平台上分享一段，力證身上並冇進行換心手術嘅疤痕。
李連杰不時喺社交平台同影迷分享日常近況，日前以「周末Vlog」及「大尺度」為題，分享一段赤裸上身做運動嘅影片，擺出各種功夫姿勢同喺泳池游泳，力證身上冇進行換心手術嘅疤痕之意。李連杰表示：「人言可畏，活在這個時代要有自己的分析，老跟着別人的輿論跑，有點麻煩。雖然不認識那位朋友，也希望不要用人家的不幸事情去炒作，希望大家都健健康康的，有自己的獨立思考最重要。」
至於李連杰所講嘅「那位朋友」就係被譽為「最帥少林武僧」嘅秋風。秋風法名延珩，係少林寺第三十四代武僧，因外貌俊俏及武術強勁而爆紅，更曾參演電視劇《赴山海》，可惜秋風去年因車禍離世，隨後網上不時有傳言指秋風之死並唔係單純意外，再加上內地男星于朦朧墜樓身亡事件，喺網上掀起各種傳言，而家傳出與李連杰有關謠言。
