下個月尾就係聖誕節，大家係咪已經開始計劃聖誕有咩好節目，王祖藍、李亞男兩公婆，今年聖誕將率領一眾藝人朋友開騷，同大家一齊慶祝，當中有唔少藝人仲係專程返港參與，包括年屆95歲嘅喬媽小金子、黃愷欣，屆時一齊上台大合唱。
祖藍之前作客內地節目曾經透露好擔心自己過唔到46歲。報道一出，即令大家關心現年45歲嘅祖藍，身體健康係咪出現狀況。祖藍呢日有親自解畫，認為呢個係一家之主嘅男人埋藏喺心底嘅心魔，祖藍話現時可以做嘅就係保持健康，同埋定時驗身。
黃劍文同陳芷盈已開始構思歌單，不過喺呢個聖誕騷之前，佢哋要先出埠登台，芷盈準備出發去加拿大登台，以及在港為新歌拍攝MV，抱病在身嘅芷盈希望身體早日康復應付工作。劍文將會聯同「中聲」戰友飛到新加坡開騷，屆時會有好多粉絲飛往當地捧場。
至於兩位靚媽王君馨同關心妍已經諗好表演內容，Grace預告表演勁歌熱舞。佢話騷前會帶囡囡去紐約，返港演出時，囡囡應該仲未適應香港時差，屆時可以帶囡囡嚟睇騷，不過佢話平時囡囡夜晚七點就瞓覺。
