周柏豪日前現身電台拍住鄭子誠為廣播劇開工，要同呢位音樂情人靠把聲合作，柏豪坦言好緊張，自己係抱住學習心態做好呢套劇。柏豪讚子誠呢位師兄厲害，即使面對再長嘅對白都游刃有餘，令佢擔心自己會食螺絲。
柏豪平常好鍾意扮卡通人物聲錄音畀一對仔女聽，令仔女覺得佢哋係被鍾意嘅卡通人物鼓勵。作為廿四孝爸爸嘅柏豪，講起一對仔女即刻慈父上身，仲大爆仔女鍾意聽K-POP，好彩囡囡仲會支持吓自己，有時話要聽爸爸嘅歌，佢都好感謝囡囡咁捧場。
講到資深藝人許紹雄上個月病逝，同Benz哥多次合作嘅柏豪就因為工作在身，未能見前輩最後一面。柏豪形容Benz哥非常幽默、照顧後輩，只要Benz哥喺後台就唔會有悶場，自己會永遠記住呢位前輩。
