莫文蔚（Karen）相隔四年終於宣佈再返香港開騷，場地就係最多可容納五萬人嘅啟德主場館！Karen呢日以一身若隱若現嘅紅色裝扮現身記招，顯然心情極好。Karen表示個唱已經喺內地做完12場，已經告一段落，估唔到咁好彩可以得到啟德個場。
至於喺歌單編排上，Karen就話會多返好多廣東歌，亦有國語歌，所以頭痕要點排。服裝方面，Karen預告會閃爆全場，亦會騷下身材。
Karen之前喺內地巡演，請到嘅嘉賓各個重量級，香港嘉賓人選唔可以輸蝕，不過Karen就話暫時要賣下關子。四年前Karen開紅館騷，老公有上台彈琴，因為當時以為自己係喺香港最後一次開騷，亦覺得好難得，先叫老公上台做一個四手聯彈，但今次佢就話老公喺後台打點就得，因為個騷嘅rundown逼爆。
喜事連連嘅Karen除咗開騷，仲推出一千張限量黑膠，而早前有指佢豪擲過八千萬港幣購入半山豪宅，Karen亦冇否認，只係話：「呢啲嘢唔好講，香港係我家。」
